Шымкент қаласында кеңес әскерлерінің Ауғанстаннан шығарылғанына 37 жыл толуына орай митинг өтті. Жыл сайынғы іс-шараға ауған соғысының ардагерлері мен олардың туыстары, гарнизон әскери қызметшілері, қала әкімдігінің өкілдері және жастар қатысты.
Салтанатты жиын Абай, Әл-Фараби және Тұран аудандарының біріктірілген қорғаныс істері жөніндегі басқармасы аумағында орналасқан жауынгер-интернационалистерге арналған ескерткіш жанында өтті. Таңертең ерте жергілікті әскери басқару органдарының өкілдері қорғаныс істері жөніндегі департамент бастығы полковник Әбдіғабит Шегебаевтың жетекшілігімен және ауған соғысы ардагерлерімен бірге гүл шоқтарын қою рәсімін өткізді.
Өз сөзінде полковник Әбдіғабит Шегебаев жиналған ардагерлерге алғысын білдіріп, олардың көпшілігі бүгінде түрлі салада еңбек етіп, жас ұрпақты әскери-патриоттық тәрбиелеу ісіне белсенді атсалысып жүргенін атап өтті.
– Біз Отан алдындағы борышын адал орындап, антқа берік болған сарбаздар мен офицерлердің рухына тағзым етеміз. Ардагерлерге көрсеткен ерлігі, табандылығы және қайсарлығы үшін ризашылығымызды білдіреміз. Сіздердің өмір жолдарыңыз – жас ұрпақ үшін нағыз патриотизмнің үлгісі, – деді ол.
Дәстүр бойынша бұл күні жауынгер-интернационалистер жыл сайын бас қосып, жауынгерлік жолдарын, қарулас достарын еске алады. Көптеген ардагерлер үшін бұл күн – мақтанышпен қатар, оралмаған боздақтарды еске алатын қайғылы сәт.
Ауған соғысы Қазақстан тарихында өшпес із қалдырды. Ұрыс қимылдарына 20 мыңнан астам қазақстандық қатысып, олардың 924-і қаза тапты, ал 20-ға жуығы әлі күнге дейін хабар-ошарсыз кеткендердің қатарында. Қазіргі уақытта Шымкент қаласында 700-ге жуық Ауған соғысының ардагері тұрады.
