КЕЗДЕСУГЕ КЕЛГЕН КӘСІБИ МАМАНДАРДЫҢ ПІКІРІ ОСЫНЫ АҢҒАРТТЫ
Л.Н.Гумилев атындағы Еуразия ұлттық университетінде жылдағы дәстүр бойынша 1 сәуірде ғылымның онкүндігі басталды. Маңызды ғылыми шараға алғашқы қатысушылар қатарында оқу ордасының Журналистика және әлеуметтік ғылымдар жоғары мектебінің Журналистика және медиаөнер кафедрасының ұйымдастыруымен Қазақстанның Бас редакторлар клубының мүшелері қонақта болды.
“Сайт жұмысының теориялық мәселелері” атты ғылыми семинар өткізіліп, онда Бас редакторлар клубының мүшесі республикалық “Білім айнасы” газетінің бас редакторы, республикаға белгілі журналист Қуантай Амантайұлы Қатшабаев сайт жұмысының өзекті мәселелері бойынша өз мекемесінің нақты тәжірибесімен бөлісті. Сонымен қатар ол журналистикадағы менеджмент және маркетинг проблемаларын жан-жақты сараптады.
Кездесуде сонымен қатар QR News сайтының бас редакторы — директоры Сапарғали Қанат интернеттегі сайтты құру, жетілдіру және оны оқырмандарға кеңінен насихаттау жайында жан-жақты әңгімеледі. Ол “Сайт жұмысының теориялық және практикалық мәселелерін” көтере отырып, осы саладағы заманауи талаптар мен негізгі қиындықтарға тереңірек тоқталды. Сондай-ақ журналистикадағы цифрлық платформалардың рөлін ерекше атап өтіп, сайт жүргізудегі менеджмент пен аудиториямен жұмыс істеудің маңыздылығын кеңінен талдады. Сонымен қатар QR News сайтының нақты мысалдарында тәжірибелік жайттарды LED экранда жан-жақты көрсете отырып әңгімелеп берді. Ол сайт жұмысының теориялық және практикалық мәселелерін нақты мысалдармен көтере отырып, осы саладағы заманауи талаптар мен негізгі қиындықтарға тереңірек тоқталды, журналистикадағы цифрлық платформалардың рөлін ерекше атап өтіп, сайт жүргізудегі менеджмент пен аудиториямен жұмыс істеудің маңыздылығын кеңінен сараптады.
Шара барысында спикерлер қазіргі медиа саласының даму бағыттары, ақпараттық сайттардың құрылымы, сапалы контент дайындау ерекшеліктері және аудиториямен тиімді байланыс орнату жолдары туралы кеңінен баяндады. Әңгіме тек сайт жасау техникасымен шектелген жоқ. Мақаланың бағасы қанша болу керек? Журналист өз еңбегін қалай бағалауы тиіс? Редакцияда команда қалай құрылады? — осындай өмірлік сұрақтар да көтерілді. Спикерлер бұған нақты сандар мен өз тәжірибелерінен мысал келтіре отырып жауап берді. «Сапалы мақала үшін төлеуге дайын редакция бар, бірақ сапалы журналист аз» — деген сөз студенттерді ерекше ойландырды. Сондай-ақ ниет білдірген студенттерді жұмысқа алуға дайын екендіктерін айта отырып, жастарға шынайы мүмкіндік есігін ашты. Бұл — теориялық дайындықты практикалық дағдымен ұштастырудың тамаша үлгісі болды.
Мұндай кездесулер студенттердің кәсіби бағыт-бағдарын айқындауға үлкен әсер етеді. Журналистика мамандығын таңдаған жас адам үшін аудиторияда алған теориялық білімнің жеткіліксіз екені белгілі. Нақты редакцияның жұмыс тәртібін, материал дайындаудың ішкі процесін, аудиториямен қарым-қатынастың күнделікті талаптарын тек тәжірибелі маманнан ғана тікелей естуге болады. Осы тұрғыда Бас редакторлар клубының мүшелерімен өткен кездесу студенттер үшін нағыз кәсіби мектепке айналды деп айтуға толық негіз бар.
Теориялық білімді тәжірибемен ұштастыру – сапалы маман дайындаудың басты шарттарының бірі. Бүгінгі медиа нарығы жылдам өзгеруде: жаңа платформалар пайда болуда, оқырман талабы артуда, контентке қойылатын сапа өлшемдері күрделене түсуде. Мұндай жағдайда оқу бағдарламасы ғана емес, сала өкілдерімен тікелей байланыс та болашақ журналистің кәсіби қалыптасуына зор үлес қосады. Дәл осындай байланысты ғылым онкүндігі аясында ұйымдастырылған бұл семинар қамтамасыз етті. Осындай мазмұнды шаралар алдағы уақытта да жалғасын табады деген сенім мол. Өйткені журналистика — тек жазу ғана емес, ол үздіксіз үйрену, өсу және саламен бірге дамып отыру. Ғылым онкүндігі аясында ұйымдастырылған бұл алғашқы семинар дәл осы рухты айқын көрсетті. «Журналистика және медиаөнер» кафедрасының осындай бастамалары университет пен медиа саласы арасындағы көпірді нығайта түседі деп сеніммен айтуға болады. Ал болашақ журналистер үшін мұндай кездесулер — тек шара ғана емес, шын мәніндегі кәсіби мектеп.
Медианың өзекті мәселелеріне арналған маңызды шараны ЕҰУ-нің профессоры, бас редакторлар клубының 1-ші вице-президенті Мұратбек Тоқтағазин жүргізіп отырды. Кездесу соңында құрметті қонақтарға құрмет көрсетіліп, кәсіби спикерлер студенттердің көптеген сұрақтарына толымды жауаптар қайтарды.
Аяулым ЖАСБОЛАТҚЫЗЫ,
Алия АЛШЫНБАЙ,
Қаракөз ЕРБОЛ,
ЕҰУ Журналистика және әлеуметтік
ғылымдар жоғары мектебінің студенттері
