(Соңы. Басы өткен санда).
Жалғап жатыр замана жолға жолды,
Естіп ең ғой мінеки ол да болды.
«Құдай жоқ», – деп қақсаған атеист пен,
Ар-ұятсыз алқаш та молда болды.
* * *
Қылсын дейік пейілін Құдай бәсік,
Ұрлық деген харам іс, ылай кәсіп,
Бұрын жортқан ұрылар дара-дара,
Бұл күндері алыпты сыбайласып.
* * *
Бір іске балді бекем буған едік,
Ысқырып бір әкімді қуған едік.
Жаңасы жылпылдаған бір керемет,
Бұрынғы әкімнен де қу ма дедік.
* * *
Қыздар жүр бір тыным жоқ желісінде,
Келеді көрінгенмен келсімге.
Жетімдер үйі толы тастандылар,
Көкек жүр ұшып-қонып ел ішінде.
* * *
Өмір деген жылдар емес сен сүрген
Өмір деген қызық емес сен күлген.
Өмір деген ісің, барлық тірлігің,
Халқыңа шын қадіріңді білдірген.
* * *
Досым сен атақ пен даңқ пайдалы
деп пе ең?..
Ей, қойшы, ол атағың қайдағы… неткен…
Жараспаған дәм-тұзы ғашықтардай,
Олар мені әрқашан айналып өткен.
* * *
Адамның ойы қашан тұрақтады?
Берілді міне бізге сұрақ тағы.
Адам ба? Адам деген кітап ол бір,
Оқуы оңай емес бірақ-тағы.
* * *
Бір үйде төрт партия, қорқасың, ә?
Таласар тірі өгіздің сорпасына.
Төртеуі төрт бұрышқа тартқылайды,
Шаңырақ түспесе игі ортасына.
* * *
Орыстың тілі бізде кіл ыңғайда,
Жұлыным бұл қорлықтан жұлынбай ма?!
Сақаумыз отыз жылда тіл шықпаған,
Қазақстан, қазағым тілің қайда
* * *
Жеткенде тағдырымның сұм ажалы,
Біреулер жері кеңіп қуанады.
Біреулер қимастықпен күрсініп жәй,
Біреулер жылай-жылай жұбанады.
* * *
Әділдік қайда кеттің бір көрінбей,
Бағаңыз лайықты жүр берілмей.
Мықтылар бұл күндері жөн сөзіңді,
Көрмейді бұралқы иттің үргеніндей.
* * *
Біреудің батып жатып, айда арманы:
– Қозғаңдар, итеріңдер айда арбаны.
– Қозғалды…
– Қалай қарай? – деп сұрағам,
Бірақ та ешкім жауап қайтармады.
* * *
Белгілі жәй, несіне жасырасың
Адамшылық кәрі мен жасыңа сын,
Біреулерден өмірде зыр-зыр қашып,
Біреулерді көруге асығасың.
* * *
Иттердің қасиеті сақ тұрғаны,
Бір досты ырылдап шын жақтырмады.
Талай дос жылмаң қағып алдап кеткен,
Адал дос сол итімдей таптырмады
* * *
Бұзылатын бұрынғы келбет, кейпің,
Адам бар ма ауырса сенделмейтін.
Сол аурудың ішінде ең жаманы
Махаббаттың ауруы емделмейтін.
* * *
Аспанға мойыныңды бұрмайсың көп,
Тірліктің тауқыметін жырлайсың кеп.
Сан жетпес жұлдыздардың бірі мендік,
Тілеймін сәуле шашып тұрғайсың деп.
* * *
Жақсы өлсе жанарлардан жас тамады,
Тұнжырап талайлардың қас-қабағы.
Өздері өлгенменен жақсылардың,
Екінші өмірлері басталады.
* * *
Адамдар тоқтамайды шамалыға,
Талпыну талаптары жоғарыға.
Ұсынып кем талантты басшылыққа,
Халықтың қалып жүрміз обалына.
* * *
Бір ел бар оқ астында зуылдаған,
Бір ел бар аққан қаны жуылмаған.
Ойласаң соның бәрі бейбіт күннің,
Қадірін ұқпағаннан туындаған.
* * *
Оқыдым ғаламтордан мұны депті,
Айтқаным ақиқаттың шыңы депті.
Қолжаулық қып алғасын кім көрінген,
Бұл күнде саясаттың құны кетті.
* * *
Сұлу көрсең жан-жүйең қызынады,
Сабындай-ақ көңілің бұзылады.
Жүрек сонда сабырмен дейді саған,
«Тым жеңілдеу екен ғой тұзың әлі».
* * *
Өмірдің сырын зерттеп топшыладым,
Қиыннан қиналсам да көп шыдадым.
Ішімнен бір үн шықты: – Бұл өмірдің,
Сырына жеткен адам жоқ шырағым.
* * *
Ертеде әділетті болған абыз
Шындығы оның айтқан толған аңыз.
Бүгінде шындық деген өте қымбат,
Сондықтан оны сирек қолданамыз.
* * *
Қарасаң достарыңның түрі де көп,
Олардан маңды жерде ірі де жоқ.
Жол бермей жүргенменен тыныштықта,
Басыңа іс түскенде бірі де жоқ.
Рза ОҢҒАРБАЙ,
ақын,
Маңғыстауоблысы
