Шымкент қаласында жалдамалы тұрғын үйді бөлу жұмыстарының кезекті кезеңі өтіп, баспана кезегінде тұрған 30 отбасы жаңа пәтер кілтін алды.
Салтанатты рәсім «Көрме» орталығында өтті. Іс-шараға қала әкімі Ғабит Сыздықбеков қатысып, қоныс иелерін жаңа баспанамен құттықтады. Қала басшысы кезекте тұрған азаматтарды тұрғын үймен қамтамасыз ету – әлеуметтік саясаттың басым әрі тұрақты бағыттарының бірі екенін атап өтті.
Әкімдік мәліметінше, бұл бағыттағы жұмыстар тұрғын үйлердің дайындық деңгейіне және қажетті құжаттардың рәсімделуіне қарай кезең-кезеңімен жүзеге асырылып келеді.
Жаңа пәтерлер мүгедектігі бар азаматтарға, ерекше қажеттілігі бар балаларды тәрбиелеп отырған отбасыларға, сондай-ақ ата-ана қамқорлығынсыз қалған және жетім балалар санатындағы азаматтарға берілді.
Көпқабатты тұрғын үйлер Асар-2 және Тұран шағынаудандарында орналасқан. Тұрғын кешендер инженерлік инфрақұрылыммен толық қамтамасыз етілген және қоныстануға дайын.
