ШЫНДЫҚ АЛМАСТАН ДА ӨТКІР

Әдебиет
383 Views

Терең су үндемей ағады,

Саяз сарқырап миыңды шағады.

*   *   *

Ақиқат айқайлап тұрады.

*   *   *

Көкек көлеңкесіне мақтанады.

*   *   *

Көзіңше мақтайды,

Жоғыңда даттайды…

*   *   *

Биікке шығу қиын,

Түсу оңай.

*   *   *

Шындық көрініп тұрады,

Өтірік білініп тұрады.

*   *   *

Өмір шексіз боп көрінеді,

Шегіңде жүргеніңді сезбейсің.

*   *   *

Көлеңкесіз бәйтерек кімге керек?

*   *   *

Бақа менің көлшігімнен басқа,

Көлшік жоқ деп ойлайды.

*   *   *

Күрегіне сай емес сап,

Тез сынады.

*   *   *

Дария — бұлақтан басталады,

Сөз — құлақтан басталады.

*   *   *

Білмесең үндемегенің дұрыс,

Сөйлеуші сені білгір екен деп қалады.

*   *   *

Байдың айқайы білінбейді бар болған соң,

Кедейдің айқайы білінеді ішер асқа зар болған соң.

*   *   *

Әр құс — өзінше сайрайды.

*   *   *

Ең құдіретті күш — сөз.

*   *   *

Ашудың бір жақсы жері бар,

Айта алмаған сөзіңді айтқызады.

Ақылдың бір жаман жері бар,

Айтайын деген сөзіңді тежеп қалады.

*   *   *

Жастар қарттарға:

Өмірінің соңғы кезеңін сүріп жатыр деп,

Аяушылықпен қарайды.

Қарттар жастарға,

Өмірін қалай бастар екен деп,

Аяушылықпен қарайды.

*   *   *

Көп адамдар ақыл айтқыш келеді,

Бірақ өздері айтқан ақылымен жүрмейді.

*   *   *

Жүрек сезеді — оны үміт жібермейді.

*   *   *

Айтар сөзіңді ірікпе,

Сенің айтпаған сөзің,

Айтылар сөздің өзі боп қалуы мүмкін.

*   *   *

Көпшіліктің көңілін табуда қиын,

Алдымен күлсең ұшқалақ атанасың.

Соңында күлсең момын атанасың.

*   *   *

Бізде бір жаман әдет бар.

Өзіміз айтсақ сенбейміз,

Конфуций айтты десе сенеміз.

*   *   *

Біреу артық сөйлеп еді,

Орнына қойдым деп мақтанамыз,

Сенің ойың ақырғы өлшем емес,

Әркім әртүрлі ойлайды.

*   *   *

Қаншама әрекет жасағаныңмен,

Алланың белгілеген,

Күні, сағаты жақындай береді.

*   *   *

Итке қожайынынан артық адам жоқ.

*   *   *

Адамның жаманы жоқ,

Жаман ететін істеген ісі мен сөзі.

*   *   *

Түннің артынан күн шығарын ұмытпа!

*   *   *

Бәлені алыстан іздеме,

Ол қасыңда жүр.

*   *   *

Ыстық суықтан,

Суық ыстықтан қорқады дейміз.

Бірақ екеуінің де арғы атасы,

Күн екенін білмейміз.

*   *   *

Адамдарда бір мінез бар.

Айтпа десең айтуға асығады,

Айт десең,

Айтпауға асығады.

О, несі?

*   *   *

Сөз де оқ сияқты — жаныңды жаралап кетеді.

*   *   *

Ыдысты ұрып көр,

Даңғырласа бос болғаны.

Дыбыссыз болса ішінде бір нәрсенің болғаны.

Осы емес пе мысалы,

Ақылдың кемелденіп толғаны.

*   *   *

Ағаш балғаның алдында дәрменсіз,

Себебін біліп тұрса да,

Не демейді көргенсіз.

*   *   *

Өзің біреусің,

Қиялыңмен екеусің.

*   *   *

Жеңілтек алдымен ұшады,

Қаңбақ соның мысалы.

*   *   *

Көңілде жасырғаныңды,

Көзің айтып қояды.

*   *   *

Ортада ой.

Үміт алға жетелейді.

Күдік артқа,

Төреші өзің,

Тәуекелің не дейді?!

*   *   *

Өмір – сахна,

Біреуге күлсең,

Ертең соның рөлін өзің ойнап қалуың мүмкін.

Ералхан ЖЫЛҚЫАЙДАРҰЛЫ

Добавить комментарий

Ваш e-mail не будет опубликован. Обязательные поля помечены *