Шымкент қаласында 7 жастағы оқушыға қатысты әдепсіз әрекет жасалды деген күдікпен мұғалімге қатысты қылмыстық іс қозғалды.
Оқиға 25 ақпанда сабақ барысында болған.
Жәбірленуші қыздың анасының айтуынша, бала үйіне көңіл-күйі түсіп, денесінің ауырғанын айтып келген. Кейін ол 36 жастағы мұғалімнің өзін тізесіне күштеп отырғызып, жіберуін сұрағанына қарамастан әдепсіз әрекеттер жасағанын жеткізген.
Анасының сөзінше, қыз: «Анашым, төменгі жағым ауырып тұр. Мұғалім партаға келіп, басымды өзінің төменгі жағына қысты. Ауызыма қатты бір нәрсе тиді», – деп айтқан. Сондай-ақ, мұғалім оны алдына отырғызып, денесіне қол тигізген, жыныс мүшесін киімнің сыртынан қысып әрекет жасаған. Қыз орнынан тұрмақ болғанда ұстаз оны жібермей, қолынан қатты ұстап отырған. «Жіберіңізші, өтінемін, маған ауырды» деген өтінішіне қарамастан оны босатпағаны хабарланды.
Ата-анасы жағдайды анықтау үшін мектепке барған кезде әкімшілік қарсылық көрсеткен. Мектеп директоры бейнебақылау камераларындағы жазбаларды көрсетуден бас тартқан. Соның салдарынан жанжал туындап, итеріс кезінде баланың әкесі зардап шеккен.
Бейнежазбаларды полиция шақырылып, құзырлы органға жүгінгеннен кейін ғана алған. Кадрлардан мұғалімнің қарсылық білдірген қыз баланы тізесіне күштеп отырғызғаны көрінген. Ата-анасымен кездесуде ол нақты түсініктеме бере алмаған.
Қазақстан Республикасы Қылмыстық кодексінің 121-бабы негізінде қылмыстық іс тіркелді. Қазіргі уақытта оқиғаның толық мән-жайын анықтау үшін барлық қажетті сараптамалар мен тергеу әрекеттері жүргізілуде.
